Sauvem los transpòrts publics dins las Valadas Occitanas

L’Assemblada Occitana Valadas a lançat la mobilizacion “Sauvem los transpòrts publics locals dins nòstras Valadas Occitanas”. Avèm invitat totes a utilizar lo tren o lo bus chasque jorn, en particular dissande 26 e diamenja 27 de junh.

Nòstre apèl es arribat après los talhs recents a la linha ferroviària Coni-Niça (e malgrat lo succès restontissent del concors al FAI, lo Fons de l’Environament Italian), après la propòsta aprovaa per la region Piemont de remplaçar la linha ferroviària Pineròl-la Torre de Pèlis (actualament suspendua) per una via bus-vèlo (en utilizant los fons del plan de recuperacion, que se deurián emplejar per la reconversion verda) amb de còsts estratosferics.

Amb una insisténcia creissenta, s’auvís parlar dels talhs novèls còntra los trajèctes de bus dins nòstras Valadas (amb la justificacion que devon cobrir los trajèctes per l’espital de Verduno). Es inacceptable de talhar los servicis de transpòrt public de las Valadas (que ja se pòrtan fòrça mal). Nòstras Valadas pòon pas èsser abandonaas.