Tenda: un retard que justifica l’autonomisme!

Aquestes jorns, dempuei diferentas parts, se legís que i aurà de retards probables dins la conclusion de las òbras del Tunèl de Temda Bis, amb una dobertura que seriá renviaa d’octòbre de 2023 a mai de 2024. S’aquestes relambis foguèsson confirmats, aquò significariá que non se poiriá pas encara transitar dins lo nòu tunèl per tot l’ivèrn 2023-2024 amb los damatges economics inevitables per las Valadas Occitanas de l’estat italian.

Coma Assemblada Occitana Valadas, sèm pas en mesura de definir las causas dels retards mas nos volèm far los pòrtavotz de la colèra que s’auvís fòrt en Val Vermenanha a causa del retard de l’anonci (probable), a ben pauc de mes de la dobertura prevista. La colèra es justificaa, prevesibla e sacrosanta.

I aviá dins l’aire un renviament possible de pauc de mes (per pauc, se parla de la primiera mitat del mes de decembre, en tot cas abans las setmanas de Chalendas), un renviament pus consistent risca de getar dins lo descoratjament las activitats economicas presentas sus plaça.

Coma mesura compensatòria minimala creèm qu’es util d’aumentar lo servici ferroviari, de lo rendre eficient e, per n’encoratjar l’usatge, ne chaudriá reduire las tarifas…

Dempuei sempre, creèm que la solucion a fòrça problèmas montanhòls dins las Valadas Occitanas es una implicacion màger de las realitats localas, amb una vera macroregion transestatala que rebata la cultura e las confinhas de la nacion occitana!

Aquesta macroregion deuriá aver una autonomia quasi totala e aver autoritat sus un baron de tèmas (santat, transpòrts, escòla, circulacion, agricultura, torisme…) e aver de fons pròpris (e sufisents) per resòlver los problèmas qu’afligisson las nòstras Valadas!

Lo retard (probable) del Tunèl de Tenda justifica donc nòstras demandas d’autonomia mai granda! Siam convençuts que las institucions localas devon avalorar totes los chamins per se far auvir, comprés aqueste!