Omenatge a Geli Grande
Aprenèm amb una immensa tristesa la despartia del copresident del Partit de la Nacion Occitana (PNO), Geli Grande.
Per nòstra associacion èra un ponch de referéncia politica, un òme qu’a dedicat sa vida a l’occitanisme, un dels darriers militants del PNO qu’a conegut Francés Fontan.
Coma Assemblada Occitana Valadas, lo costegèrem mai d’un viatge, sobretot quand deviam prepausar d’iniciativas comunas (coma l’accion dels tractes de julhet de 2021 e los eveniments “Una maison, una bandiera occitana” que se faguèron pendent los ans seguents).
Sempre èra un òme fòrça disponible e gent!
Nos unissèm al dòl de sa molher, de sos pròches e dels amics del PNO dins aqueste moment grèu!
Ont que siás, Geli, siam segurs que nos seguiràs!
Portarem endavant tas batalhas en esperant, per utilizar los mots d’un amic tieu, de te veire un jorn sus lo libre dels combatents per la libertat d’Occitània!
Te siás enanat tròp lèu… a 69 ans solament!
Ta vida serà per totes nosautres un exemple!
Vischa l’Occitània liura!
