by Coma un baron de gents, nosautres de l’Assemblada Occitana Valadas, desiràvem que 2025, tochant lo chamin de fèrre Coni-Ventimilha, poguèsse començar melhor que çò que s’es passat en 2024 e donc devèm ja parlar al passat (e siam lo 3 de genier…).
L’An Nòu poiá pas començar piéger… La supression de las navetas, los retards dins los oraris, los inconvenients per los toristas, pendoliers e trabalhaors transfrontaliers se còmptan pas mai sus los dets d’una man (e benlèu pas mai de doas mans…). Aquò es escandalós…
Exprimissèm la mai granda solidaritat amb los usatgiers del chamin de fèrre e remerciam l’observatòri ferroviari de Tenda per lo bòn trabalh que fa dins la comunicacion e l’assisténcia tecnica als usatgiers.
Creèm pasmens qu’en Val Vermenanha se tempta un «valicidi»: es un neologisme que cream per exprimir melhor l’idèa de çò que s’activa dins nòstras Valadas. Amb l’arrèst del Tunèl de Tenda (qu’aüra a atench e despassat los 4 ans e los 5 ivèrns), se poiá esperar una atencion màger a la linha ferroviària. Una linha ferroviària qu’al contrari sembla volontàriament eissubliaa per lo centralisme.
Lo valicidi, a nòstre vejaire, es un acte destinat a favorizar lo despoblament de las Valadas Occitanas! Es en cors dins totas las Valadas!
Per sortir d’aquela desagradabla situacion, la sola solucion es de tornar creire en lo drech a l’autodeterminacion del pòble occitan!
Lo silenci, lo planh silenciós, las colleccions de signaturas, la desercion de las urnas sufison pas mai! Nos chal tornar sentir occitans! Chal tornar revendicar, de biais democratic e pacific, çò que nos aperten de drech segon la Charta de Clivàs: la província autonòma occitana!
La linha Coni-Niça pòt viure solament amb lo territòri que la contraròtla! Las nòstras vals devon prene lo contraròtle dels transpòrts publics locals! Las entitats mai pròchas dels ciutadans devon aver lo contraròtle dels servicis!
Arrestem lo valicici, ensems!
