Quin futur per las liasons entre la Val Vermenanha e la Val de Ròia?

Nosautres de l’Assemblada Occitana Valadas nos unissèm a las preocupacions del cònsol màger de Tenda per lo futur de las relacions entre la Val Vermenanha e la Val de Ròia.

Es pas lo primier viatge, ni lo darrier, que tornam sus lo tèma. La viabilitat, coma totes sabèm, es estaa grèvament damatjaa per la tempèsta Alèx del 2 d’octòbre passat.

Sabèm coma, dins los territòris administrats per l’estat francés, las òbras de restauracion son en cors mentre que dins l’estat italian siam encara vergonhablament immobils.

S’es dobèrta una liason, l’Estraa dels 50 Contorns, qu’es pas capabla de sostenir un trafec important.

Es necessari, d’en primier, de construire un bescontorn dempuei lo vielh tunèl per despassar la part escranchaa.

Es chausa saupua que la viabilitat tornarà pas coma abans, almens fins en 2023; per tant, creèm qu’es indispensable de relançar la linha Coni-Niça! Relançam la nòstra propòsta de crear una liason amb l’aeropòrt de Niça!

S’es demostrat scientificament coma los eveniments extrèms aumentaràn dins los ans e los decennis que venon… Nos demandam se la respònsa que lo govèrn italian vòl portar es lo “modèl de Tenda”. En aquel cas, poèm mas qu’exprimir la nòstra preocupacion…

Nos chal un plan estrategic còntra la crisi e, a l’encòp, un apròchi rapid per tornar contruire las infrastructuras damatjaas… Una val viu se i a de trabalh e, dins lo cas de nòstras vals, es lo torisme…

L’Assemblada Occitana Valadas del costat dels occitans, sempre!

Daissar un comentari

Vòstra adreça de messatjariá serà pas publicada.