Sostenèm la peticion per metre en seguretat l’estraa del Valon d’Èlva!

Nosautres de l’Assemblada Occitana Valadas sostenèm amb conviccion la peticion per la redobertura de l’estraa del Valon d’Èlva. Es una estraa fondamentala per arribar a Èlva.

Poèm pas tolerar que se parle d’Èlva solament per lo percentatge dels non-vaccinats e non per aqueste problèma verai qu’afligís Èlva, qu’es la dificultat de i arribar!

Sens l’estraa del Valon, Èlva es pas atractiva per los abitants (que devon alonjar notablament lo trajècte per arribar a l’estraa principala de la Val Maira!), ni per los toristas, ni per las eventualas personas interessaas per repoblar lo borg occitan.

Defendèm lo drech de las gents d’Èlva de viure a Èlva!

Avèm aprés que fòrça institucions, associacions e entitats de la província de Coni (en particular de las Valadas Occitanas mas pas solament) se son engatjaas (amb los abitants e los amorós d’Èlva que son lo verai motor de l’iniciativa) dins aquesta accion de sensibilizacion, en rendent donc aquesta accion fondamentala per arribar a l’objectiu final, qu’es de metre en seguretat, e amb succès, la redobertura de l’estraa!

Sauvem Èlva totes ensems!

Vos conviam a signar la peticion!

Daissar un comentari

Vòstra adreça de messatjariá serà pas publicada.