Fèsta de las Fòrças Armaas: l’Assemblada Occitana Valadas festeja pas la victòria mas se soven d’aqueles que son chaüts
Encuei, aqueste 4 de novembre, en Itàlia se festeja la Fèsta de las Fòrças Armaas. Aquesta fèsta es estaa instituïa en 1919 per “festejar” la victòria d’Itàlia dins la Primiera Guèrra Mondiala (aquela que li dison la “Grand Guèrra”).
Nosautres de l’Assemblada Occitana Valadas respectam las fòrças armaas e lo trabalh que desplejan sustot dins de situacions d’emergéncia, mas nos associam pas a las festejaas per la victòria!
La Primiera Guèrra Mondiala se passèc entre de poténcias estatalas, foguèc una guèrra imperialista que se’n deguèron remetre los païsans e los obriers de las etnias minoritàrias.
I a pas una comuna dins nòstras Valadas sens una lausa de recòrd dels mòrts de la guèrra. Son de miliers los abitants de las Valadas mandats al massacre en nom d’una guèrra inutila e ridicula.
Encuei festejam pas la victòria mas nos sovenèm d’aqueles que son chaüts.
Quasi totas las familhas an agut un filh, un nebot o un amic mòrt a la guèrra.
En mai d’aquò, ramentam la necessitat de constituir d’estats federals, amb una fòrta autonomia per las minoranças a l’interior dels estats.
