Eleccions administrativas de Chastèldalfin

Nosautres de l’Assemblada Occitana Valadas seguissèm amb ben d’atencion las eleccions administrativas de Chastèldalfin, siá per lo valor simbolic del luòc, siá per lo clima que s’es creat dins aquesta campanha electorala. Nos dissociam de las atacas recipròcas que, totun, meritan pas d’intrar dins lo programa electoral e qu’apertenon al domeni personal.

Avèm adreiçat las demandas seguentas als dos candidats e avèm recebut las respònsas seguentas de Domenge Amorisco:

1. Sabètz que vòstra comuna a aderit a la lei 482/99? “Sio estat cònsol màger de Chastèldalfin per dos mandats de 2006 a 2016. Durant aquestes dètz ans, non solament avio conoissença de la lei 482/99, mas tanben ai recebut de finançaments dirèctes de la Region de Piemont sus aquesta lei.”
2. Sabètz que la comuna que i siatz candidats fa partia de la minorança etnolingüistica occitana? “Òc, per las rasons ja expausaas çai sus.”
3. Vòstra lista es dispausaa a defendre la lenga, las tradicions e la cultura occitanas? “Òc, que se tracta de la màger part dels candidats de l’endrech.”
4. Dins los ans ont seretz administraires de vòstra comuna, promouretz l’ensenhament de la lenga e de la cultura occitana dins l’ensenhament escolar? “Nos engatjarem per l’ensenhament escolar de la lenga e de la cultura occitana, mas l’escòla primària, qu’es estaa suprimia a Chastèldalfin perque i aviá pas mai d’enfants que la frequentavan, depend de l’estat qu’a una competéncia especifica sus las matèrias d’ensenhar.”
5. Vòstra comuna a ja la dobla demonimacion occitana e italiana? “Dempuei de temps immemorials Chastèldalfin se conois tanben amb lo nom de «la Vila».”
6. Siatz prèsts a autorizar los conselhiers comunals a parlar en lenga d’òc dins los conselhs comunals? “Lo problèma es dins la verbalizacion que fai lo secretari comuncal, lo qual, s’es pas de l’endrech, reüssís pas a verbalizar en lenga occitana.”
7. Vos engatjatz a prepausar una mocion per la creacion d’una província autonòma de las Valadas Occitanas de la Region de Piemont? “Se chal far una accion de sosten a una mocion consensuala per la creacion d’una província autonòma de las Valadas Occitanas piemontesas, nosautres i serem.”

Dementre, Albèrt Anello nos a enviat un extrach de son programa ont s’escriu: “nòstra administracion reconois lo valor de la lenga e de la cultura occitana”.

En esperant que las listas respectivas seguischan las proposicions qu’avèm fornias, desiram que lo clima se pòscha tranquillizar e que lo debat se pòscha concentrar sus los problèmas de las gents de Chastèldalfin, que lor enviam tota la nòstra solidaritat.